Alderle !                        Schbiel gege Jeehlinge em 30.3.14  1:5

Nachem Schbiel war´e fix un ferdig, weil´es oifach ned verschdanne häb, was do abgange isch.
Als´me de Ludi g´sähne had, wie´e do g´hengd bin, hadder g´saagd: „Waisch, wenn des g´hedt hasch, was ich g´hedt häb, dann reladiwiersch des alles“.
Wie bei vielem, had de Ludi a do widda rächd g´hedt; s´isch jo alles bloos ä Schbiel. Awwa drodzdem, s´gehd scho an d´Niere – un de Ludi war a g´schaffd.

Ich schbrech jedzd oifach mol Eich Schbieler o:
Wenne Eich so ogugg, dann häwwe den Eidrugg, dass´der Eich bei de SG scho wohlfieled. Mir hen in de ledschde Johre mid de neie Blädz un allem Drum un Dro obdimale Voraussedzunge g´schaffe, mid de Grufdies gugge´mer, dass alles in Ordnung isch un ich moin, dass´der des a zu schädze wissed.
Die Uffschdieg von de Erschde un de Zwaide hen uns saumäßig viel Fraid g´machd. Un bledzlich laafd´s nemmeh. Was isch do loos? Uff Eich rumzureide un Eich ferdig z´mache, des isch ned mei Ding.
Ihr missed wisse, mir sidze alle in oim Bood un mir drauße, mir welle uns mid Eich idendifiziere un uns mid Eich fraie, so wie mer des in ledschder Zeid g´machd hen.
Warum musch jedzd de Eidrugg hawe, dass irgendwo beim Schbiel ä Brems ozooge isch? Klar, in ledschder Zeid isch Oiniges quer g´loffe un jeder soll sich mol an´d aigene Noos greife, was´er falsch g´machd had.
Em kommende Sonndaag isch ä „Sex-Punkde-Schbiel“, än saubleeder Ausdrugg, awwa unsere liewe Medie hen so was irgendwann ämol erfunne.
Owwerweier isch ogsaagd un die misse´mer glopfe – awwa wie. Reißed Eich z´samme, kämpfd wie die Hiehner un alles wird guud. Mir schdehn hinner Eich un gemoinsam schaffe mer´s.
Ihr missed ned nur an uns do drauße dengge sondern a an die Zwaid, die beim ä Abschdieg a runner missde. Ned vergesse derf´mer unser A-Jugend, die Gewehr bei Fuß schdehd un Eich kinfdig unnerd Ärm greife werre. Noi, noi, die junge Kelre, die do komme sin koi Konkurrenz fir Eich. Mid denne z´samme solle´der oifach noch besser werre.
Uff oinzelne Schbieler wille jedzd ned eigeh. Awwa Max, Benny un Mirko däd Eich im Middelfeld ned Oiner guud du wie de Michael? Der kennd die Fäde in d´Hand nemme un Eich endlaschde. Un wenn´er nemmeh kann, dann kennd jo de Thorben fir´en reikomme un sei Ärwed weidermache. Die Zwaid kann die baide guud endbehre, denn do brennd nix meh o.
Schwädzed mol mid´em Timo, Eierm neie Träner, dem´e von do aus viel Gligg winsch.
IIbrigens, vor dem Schbiel gege Owwerweier hemmer jo morjens die Dauf von unserem Rasemäher. Ich geh dävo aus, dass´der alle do sin, denn der sorgd jo schließlich däfier, dass´der oschdennig schbiele kennd.
Än Name kenned´er Eich fir den Kerl a noch ausdengge. De Vorschlag vom Hacker: GRR – „Grufdies-Rasen-Rollator“ hen mir Grufdies nadierlich oischdimmig abglehnd!!!
Also – auf gehd´s – gemoinsam schaffe´mers!!!

Eier Alderle