Alderle, Alderle !            Pokalschbiel  gege Knielinge       14.8.2013

Heid musch mindeschdens zweimol „Alderle“ saage. So ä Schbiel, des gehd an d´Nerve – awwa wie! Aigendlich hasch´der vorrem Schbiel g´saagd, d´Schoose sin gering, weil die Annere ä Klass heher schbiele. Pfeifedeggel; nach 10 Minudde had de Bomba än Freischdoss g ´schosse un de Goschi had abgschdaubd: 1:0 fir uns. Ned schlächd, so wie des ogfange had.

Awwa dann isch de Schiedsrichder komme. Än kloiner Kerl, der Diesjohr in d´Kreisliga uffgschdiege isch, un had dem Schbiel de Schdembel uffg´sedzd: 3 gälwe Karde fir uns un kurz vor de Halbzeid had de Goschie ä Faul g´machd, de Anner had sich schreiend vier Mol um die aige Ax drähd un de Goschi war mid gelb-rod draus. De Anner isch dänoch widda g´schadanne wie en Oinser !!!!!
Kurz nach de Halbzeid had de Nici än Freischdoß uff de Kopf vom Max z´irgeld, un scho simma 2:0 vorne g ´lääge. Jedzd isch ä Abwehrschlachd komme, in der de Daniel de Fels in de Brandung war un de Ron Dinger g´halde had, die ned ämol de Neier raus g ´hold hed.
Mir ware uns sicher, mir sin weider. Un dann ischs losgange: In de ledschde Minud hen die Knielinger s´2:1 g´machd und dann had de Schiedsrichder 2 Minude nochschbiele g´lasse. Warum, weiß koi Mensch. Rugg, zugg isch´s 2:2 g´schdanne un s´isch in d´Verlengerung gange.
Nach ä paar Minudde had der kloine Kerl widda pfiffe, weil er – awwa tatsächlich nur är äloi – g´moind had, dass de Flo ä Faul g´machd had. Als der dann do druff was g´saagd had, had´er em a die gälb – rod  zaigd. Un mir ware nur noch 9. Unser Kerl hen tapfer weider g´kämpfd un so ischs zum Elfmederschieße komme. De Ron had zwai Dinger raus g´hold un s´isch imma weider gange. Zum Schluss had´er dann sälwa schieße misse – un des war´s dann!
Dragisch, dragisch. Der Kerl had´der richdig laid du kenne, weil´er jo des ganze Schbiel iwwa so guud g ´halde had.
Awwa ned er war Schuld an derre Niederlaag. Ich häb jo sälwa oinige Johr pfiffe un waiß, wie schwer s´isch. Awwer der Kerl heid Obend, der had oiner g´schbield, des ned nochvollziehe kannsch. Als de Zimbo mid´em Schlissel in d`Kabin mi´em gange isch, häwwe zu´emg´saagd:
Äm beschde isch, du schließ´en glei ei un lasch´en nemmeh raus.

Eier Alderle