Alderle !           Die saubleed Liggebleiwerei                       6.9.2015 

Was´me heid b´sonners umdreibd, des sin die viele, ach so arme, verledzde Schbieler, die sich imma widda uffem Bodde rumwälzle.
 
Liebe Schbieler (dodämid moine alle von hiwwe un driwwe),
wissed Ihr aigendlich, was mir dord drauße als Zuschauer alles midmache. Mir komme uff de Schbordbladz, weil´mer Fraid em Fußball hen, weil´mer scheenen Fußball sähe welle un nach Meeglichkaid en Sieg von unserer Mannschafde.
 
Mir alle hen frieher a Fußball g´schbield odda von mir aus a kiggd. Bei uns had´s a Zwaikempf gäwwe un glaawed blooß ned, dasses do ned a mol uff d´Sogge gäwwe had. Wasses do awwa ned gäwwe had, des war die saubleede Schauschbielerei. Wenn domols oiner ligge bliwwe isch, dann hasch versicherd sei kenne, dass´er a was g´hedt had un moischdens ned weiderschbiele had kenne. Weils domols awwa noch koi Auswäxelschbieler gäwwe had, isch dann oiner, der aigendlich nemmeh kennd had, drodzdem uffem Bladz bliwwe um zumindeschd en Gegeschbieler uff sich zu ziehe.
 
Kenned Ihr Eich deshalb vorschdelle, wie´s uns schdingd, wenn laufend oiner ligge bleibd un die Aigene odda a die Annere de Balle naus schbiele. Kaum had oiner middem Knie de Bodde beriehrd, heersch scho: "Schbiel de Balle naus!"
 
Herrlich dann de tosende Beifall, wenn dann de Eiwurf "fairerweis" zu de Annere g´worfe werd. Glaabed´mers, s´isch nemmeh auszuhalde. Mid fairplay had des iwwerhaubd nix zu du.
 
Fir mich gibt´s blooß oi Leesung:
 
Vorrem nägschde Schbiel gibd unser Trainer an unsere Schbieler die Order aus, dass weiderg´schbield wird, wenn oiner liggwe bleibd un dass, wenn dem sei Midschbieler de Balle ins Aus kiggd, de Eiwurf in unsere Reihe bleibd.
 
Faierweis soll unser Trainer des seim Kolleg von de annere Mannschafd sage, die kennes dann jo genauso mache. De Schiri, dem sold ma des a sage, er had jo imma noch die Meeglichkaid zu unnerebreche.
 
Oins isch klar, wenn siehsch, dass en Schbieler tatsächlich ernschdhafd verledzd isch, z.B. em Kopf, dann isches koi Froog, dass´mer de Balle nausschbield.
 
Moine´der ned, dass des besser un fußballgerächder wär?!
 
Eier Alderle