Alderle !        Ä neis Schbord - Echo                11.8.2015

Em 30. Auguschd isches soweid: Bei de SG gibd´s ä neis Schbord-Echo. Schee! S´had jo ä Weil gedauerd, bisses so weid war, warum weiß´e zwar a ned, awwa wichdig isch, dasses jedzd kommd.
Wie´s aussiehd un was annersch isch gegeniwwer dem friehere wird´mer dann sähe. Ich hoff, dasses oschbrechnd isch un d´Leid ned grad dro vorbei geh´n sondern a nei gugge un läse. Damid´se des awwa mache, muss a was drin sei, des´se indressierd un informierd. Nadierlich isch d´Wärbung a wichdig, weil jo von denne Schbonsore s´Geld kommd, mid dem´ma des Bläddle finanziere kann. Ich hoff blooß, dasses indressander werd wie s´Ordsbläddle!!!

Ab un zu wird a sicher was vom Alderle drin schdeh, ich hoff, dass d`Verbandsrunde, die jo jedzd bald ofangd, was hergibd, iwwer des ma a schreiwe kann. Ich hoff, dasses viel Positivs sei werd.

Wie s´Pokalschbiel morje Oband gege Beierde ausgange isch, weiße nadierlich jedzd no ned. Schee wär´s, wenn´mer g´winne däde, dann wäre´mer unner de ledschde Achde un domid im nägschde Johr im Verbandspokal, un des kennd bedeide, dass´mer glei än Großer zug´loosd griege, z.B. Neddinge odda Schbielberg. Des wär doch was, odda.

Do kennschd dann a widda ä kloins Feschdle mache, wie´s de Ludi jedzd vom 25.-27. Sebdember nobrochd had. Do hen nämlich alle unsere Mannschafde ä Hoimschbiel, Verbandsschbel naddierlich. Des haißd, vom Schbordliche isch des was ganz anners, wie so im ä normale Schbordfeschd, wo´s um nix gehd un koiner aigendlich Indresse had, zuzugugge. Ich hoff, dass´der alle kommed un a de Jugendschbiel zugugged. Wenn´s richdig uffzoge werd - de Ludi machd des scho  (!) - dann werd´s richdig schee; un fir d´Kass dud des a guud - mid geringem Uffwand.

Wenn des erschde Schbord-Echo rauskommd, sin scho zwai Verbandsschbiel rum un ich hoff, dass´mer do Punkt-mäßig scho was uffem Kondo hen. Also Jungs, schdrengd Eich o!

Unser "Schbordbladz-Grufdies" hen bis do no scho vorgschaffd un rund um d´Blädz rum alles sauwer g´machd. Moischdens simma so zwische 12 un 16 Leid, die do fir de Veroi was mached. S´isch als richdig schee, wenn´mers wussle siehd un dänoch alles widda schee aussiehd. Obwohl, s´Moischde, was´mer mache, siehsch aigendlich gar ned. Blooß, wenn´mers ned mache däde, dädsch´s sähe!

Dä nägsche Eisadz hemma em 24. un 31. Auguschd un dänoch imma nach de Hoimschbiel.

Also, wenn de Oind odda Anner sich´s iwwerlege däd: Er därf gern komme, imma um halwa Zehne; nach dem Moddo von meinere Oma: Viele Hände machen bald ein Ende! Nadierlich isch´mer klar, dass ned jeder aus unnerschiedliche Grind midmache kann. Wenn´mer sich awwa mid uns solidarisiere mechd: Mir hen a ä Kässle; de Joos Manfred had des unner sich un der hed mid Sicherhaid nix dägege, wenn do noch was däzu käm. Schließlich duun´mer ned blooß schaffe sondern mir unnernemme a des Oind odda Annere, was uns Schbaaß machd.

Also, Schbord-Echo: Vom Alderle un de Schbordbladz-Grufdies: "Glück Auf!"