Alderle ! Verletzung von Ron 27.4.2014
Beim Fußball brauchsch scho Nerve! Noi, ned bei dem Schachfußball von Bayern in Madrid sonnern zur Zeid bei de SG.
Ich glaab, heid war´s zum 4.Mol in derre Runde, dass de Krangewaage do war un oinen von unsere Schbieler midgnomme had. Do schdehsch drausse un leidsch mid denne Kerle mid un kannsch sälwa nix mache.
Nachdem´s de Maxi em Meniskus had, isch de Ron im Tor g´schdanne. Kurz nach de Halbzeid in Durlach-Au isch´s bassierd: De Ron isch rausg´hechded un isch mid seim G´sichd voll mid´em Knie vomme Gegeschbieler z´sammegepralld.
Ä halb Schdun ischer do gläge bis de Grangewaage komme isch. Wenn dann die zwai Sanidäder g´sähne hasch, wie´se in Mudderseele Ruh nogange sin, dann hedsch´ene Feier unner de Arsch mache kenne. De Nodarzd isch a noch komme, der war genau so langsam.
Ron, mir winsche dir, dass alles guud wird un du bal widda g ´sund wersch.
Bei so´ eme Vorfall wird´s Schbiel aigendlich näwwesächlich, s´isch awwa drodzdem weidergange un schließlich hemma 1:0 g´wonne. In derre Siduadzion, wo´mer momendan sin, saumäßig wichdig. Un nachdem die owwe dro alle verlore hen, siehd´s widda ganz guud aus.
Wenn die ledschde zwai Schbiel g´sähne hasch, dann kannsch widda Hoffnung schepfe. S´isch jo ned blooß, dass die Erschd abschdeige däd, a die Zwaid missd runner – un des bei unsere scheene Blädz un unserer A-Jugend, uff die´mer in Zukunfd nadierlich baue.
Un noch ä annere Grubb wär bedroffe:
Mir Schbordbladz-Grufdies wäre bledzlich B-Klasse-Grufdies. Des kann´s uff koi Fall sei!
Also: Mached weider so!
Eier Alderle