Alderle's Gedanken über die Jugend

Drei Schbiel häwwe jetzt net g´sähne, weil´e im Urlaub war un häb me aigendlich heid uff´d Schbitzebegegnung in Völkerschbach g´frait - nix war´s, S´had me uff d´Nos kaue. Als´e vorhin awwa g´läse häbb, wie´s ausgange isch, häwwe´me nadierlich saumäßig g´fraid. Häbb aigendlich ned so richtig dro glaabt, dass´e in Völkerschbach was reisse, awwa 2:0, des isch scho a Sach!

Nachdem de Zimbo in seim Bericht vom Söllinger Schbiel den Satz g´schriwwe had: "Die Stupfericher verbrachten viel Zeit mit dem Kommentieren der Fehler ihrer Mitspieler, anstatt den Vorteil der Überzahl zu nutzen", kann ma de Eindruck hawwe, dass de Thomas die Kerle mol richtig zur Bruschd g´nomme un ihne zeigd had, wo de Bardel de Moschd hold. Recht so!

Also so ganz ohne Fußball kann´sch jo a ned sei, un deshalb häwwe mer heid Morje wennigschdens unser B-Jugend oguckd, do had´s wenigschdens ned g´rägend. 3:1 henn´se gwonne un schdehn jedzd ganz owwe mit 12 Punkt un 32:2 Tor. S´wär aigendlich scho schee g´wäse, wenn ä paar meh Leid do g´wäse wäre!!!

Also, was´e suppa find isch, dass drei von de Erschd un de Zwaid die junge Kerl trainiere. De Marco, de Kevin un de Alex mache des ganz klasse. Ich häwwe´ne a scho mol beim Dräning zuguggd - ned schlächt, sag´e.

Obwohl - heid isch´s ned so richdig gloffe. Sie hen zwar ä schnells Tor g´machd awwa sonschd hasch scho ä bissel ziddere misse. Wahrscheinlich hen´se sich a oschdegge lasse vom undisziblinierde Verhalde von de Annere. Guud, des junge Schiedsrichderle had scho sei Probleme g´hed, awwa so wie die - inklusiv de Betreuer - kannsch´de oifach ned uffiehre.

Ich find, dass des mid de junge Schiedsrichder a iwwadriwwe werd. Ich sälwa häb domols mid 18 ogfange zu pfeife un des war noch frieh g´nug. Wenn siehsch, was´fer junge Kerl teilweis in de Owwaliga rumpfeife und wie´se sich manchmol benemme - so wie ä billige Kopie von de ganz Große -, dann machsch´der hald scho so dei Gedange.

Also, b´suched a mol ä Schbiel von unsere B-Jugend - s´nägschde isch äm Sonndag, de 21.10. um halwa Elfe gege irgend so ä Schbielgemoinschafd aus de Nachbarschafd, äm oins schbield die Zwaid gege Burbach un um drei die Erschd gege Idderschbachs Zwaide.

Also, ma siehd sich!