Alderle, Freddy ! 15.9.2013
Aigendlich häwwe jo ned vor g´hedt heid was zu schraiwe – awwa ich mach´s drodzdem, weil´e moin, dass´mer dodezu was sage muss.
Zum Schbiel, des heid die vierd 2:1 – Niederlaag hinnerenanna gebrochd had, sage gar nix.
Als´mer in de erschde Minud nach dem fulminande Freischdooß vom Alex 1:0 g´fiehrt hen, häwwe´me in de Minude druff an dem Schbiel vom Freddy so richdig „ergedzze“ kenne.
Freddy, wenne dei Eischdellung zum Schbiel sieh un wie du kempfsch – des isch ä wahre Fraid. Du bisch als Schbielfiehrer ä richtigs Vorbild und zaigsch deine Kamerade, wo´s lang gehd.
Du derfsch´mer glaawe, als des mid deinere Verledzung so 10 Minude vor de Halbzeid bassierd isch, do hen´mer alle midglidde. Mir hen zwar g´sähne, dasses ä richdig brudaales Faul war, des vom schwache Schiedsrichder ned pfiffe worre isch. Wie schlimm des awwa genau war, hemma ned so richdig midgriegd.
Erschd, wo´de de Heimo rausgfiehrd un nach allem Megliche g´rufe had, hemma g´wissd, dasses was Shlimmeres isch. Irgendwie ware alle g´schoggd – a dei Mannschafdskamerade, als mid´em Sanka abghold worre bisch.
Mir winsche dir, dass bald widda uff d´Fieß kommsch un dezu beidrage kannsch, dass´mer irgendwann in nägschder Zeid de erschde Sieg eifahre.
Des isch awwa Näwwesach – wichdiger isch dei G´sundhaid.
Mach´s guud un lass´de von de Monika schee pflege.
Dei Alderle