Alderle !            Halleluja!                    29.9.2013

Grad häwwe im Bayrische Fernseh „Ein Münchner im Himmel“ g´sähne, dä Alois Hingerl. Der had so richdig frohloggd. Mensch häwwe denggd, des kannsch heid a, nach dem schbiel gege Oberweier.

Halleluja, hen heid Middag nachem Schlusspfiff Oinige denggd. S´isch jo a mol Zeid worre. Wenn a ned alles rund g´loffe isch un mir noch ä paar meh Tor hedde schieße kenne, so war der Sieg vor allem fir d´Bsieche doch saumäßig wichdig.
Mir hen gezaigd, dass´mers imma noch kenne un hen jedzd a widda Oschluss – im Gegesadz zu Neiburgweier.
Drei Tor aus´em Schbiel raus, des war mol widda äbbes un had uns drauße an die Schbiel in de ledschde Runde erinnerd. Nachem Micha seim Tor had de Bomba druff g´halde un de Kevin had des dridde innere Ard dun Weis g´machd, dass grad schbrachlos warsch. Er war in seim Lauf ned zu bremse, genauso wie kurz vorrem Abpfiff!!!
Nadierlich muss noch Oiniges besser werre, awwa nach so´eme Sieg do fraisch´de bloß noch.
Bomba, du waisch jo, dich häwwe b´sonners ins Herz g´schlosse un ich frai me a, dass de gegeniwwa em Schiedsrichder oinigermaße z´samme raisch. Du waisch awwa a, „Nouboddi isch pörfäkd“. Wenn von vorne als schneller z ´rigg giengsch, dann bräudschd ned so ofd die Ärm in d´Lufd heewe um em Schiri ozuzaige, dass ned eigreifsch. Wärsch nämlich glei weida hinna, dann kendschd als bei´me schnelle Balle losschburde un ä Tor schieße. Iwwalegsch d´ers.
In de ledschde Schbiel häwwe´me als g´froogd, was isch aigendlich mid´em Nici los, der kann´s doch, warum machd´ers ned. Heid hasch g´sähne, dassers kann un a g´welld had. Schade, dass dei Balle in de erschde Hablbzeid ned neigange isch. Kann des sei, dass´de do vorne wohler fiehlsch? Ich glaab´s scho un de Thomas had´s wahrscheinlich a g´sähne.
De Sieg war a do defier wichdig, dass´mer widda alle durchschnaufe kenne un koi uneedige Emozione uffbaue. Ich glaab a, dass jedzd alle, die unmiddelbaar mid´em Schbielbedrieb zu duun hen, widda sachlicher un verninfdiger mid´enanna umgeh kenne.
Wenn´der des mached, dann kannsch oschließend wie´s de Alois Hingerl ausdrigge däd, sage: „Bassd scho“!!!

Eier Alderle