25.03.2013 - "Schdupfaricher Fußballer in der Krise!"
So odda ähnlich kennd ä Schlagzeil aussähne, wenn´mer in de Bundesliga schbiele däde; dun´mer awwa ned – mir sin in dä A-Klass, un do isches ä bissel annerschd.
Bleiwed sachlich un gugged eich des Ganze mol genau o: Ledschd Johr simma uffgschdiege un wer hed denggd, dass´mer die Vorrunde so super schbiele un bletzlich an 2. Schdell schdehn – koi Mensch.
Jedzd hemma hald än Durchhenga, hen dreimol verlore obwohl des em Sonndag in Siedschdern gar ned so schlechd ausg´sähne had, häwwe´mer sage lasse. S´kennd sei, dass´mer am Samsdaag bei Alem. Rüppurr a widda leer ausgehn, denn die sin im Momend ganz guud druff. Awwa a dann len´mer uns des Oschderfeschd ned vermiese – s´Wädda langd!
Hen´der a scho mol bedenggd, dass´mer ä ganze Reih Langzeidverletzder hen: De Graffi un de Marco falled scho länger aus un jedzd sin a noch de André un de Daniel dezukomme.
Also ich schdell mir des so vor, dass de Thomas scho waiß, was zu du isch, dass d´Abdailungsleidung drum rum fir Ruh sorgd, dass die Verledzde ihre Kamerade moralisch zur Seid schdehn un d´Schbieler sälwa des abrufe, was inenne schdeggd – un do kann´mer mid Sicherhaid noch oiniges hinne vor hole.
Wie g´saagd, oifach ruhig bleiwe un sich un die Annere ned verriggd mache. Des gild a fir d´Zschauer. Des sin jo imma die Erschde, die unruhig werred. De „Bruddelhiegel“ lässd grieße!
Grad nachem Bussebacher Schbiel häwwe g´heerd, wie´se iwwer de Zuschdand von dä Blädz g´schläschderd hen. D´Grufdies hen scho oiniges g´machd un jedzd siehd´s scho widda viel besser aus. Em Donnerschdaag hemma ä weideres G´schbräch mid de Blatzbaufirma un wärre die richdige Maßnahme dreffe. Oins had sich rausg´schdelld, dass d´Owwafläche zu schdark verfilzd isch un g´schdriegeld wärre muss. Deshalb kann a des Wassa ned so schnell ablaafe. Wenn´s Wädda uffgehd, dann siehd´s scho widda bessa aus, glaawed´mers!
"Lebbe gehd weida", had domols de Schdebanowitsch g´saagd – un so isches. A bei uns in Schdupfarich!
Eier Alderle