Des Johr had´s scho in sich g´hedd! Ma waiß gar ned, wo ma ofange soll. Los gange isch´s jo mid´em Jako-Turnier. Wenn´der vorschdellsch, wie viel Mannschafde un Kuche de Rainer uff d´Fies bringd, des isch scho äbbes!

Beim Jubiläumsobend hemma bewiese, wie ma so ä "Feschdbangedd" a logga g´schdalde kann und sich ned än Haufe unneedige Schwätzereie oheere muss. Allene had´s g´falle, un des isch s´Wichdigschde.

Nach´em Schbiel gege d´Geheerlosenationalmannschafd isch so langsam des End von de Verbandsrunde näher g´rickd. Ma had jo nemme dro g´laabd awwa unsere Jungs hen´s g´schaffd: Mir sin uffgschdiege - un des bei neie Blätz un im Jubiläumsjohr, was willsch aigendlich meh?!

Dann isch´s mid riese Schridd uff´s Jubiläumsschbordfeschd zugange. S´war richdig schee! Ma waiß gar ned, was ma rausheewe soll. Uff jeden Fall war der Oband mid de Band un de zwai Moderadore un allem Annere sauschdark. Awwa dass so was glabbd, wie´s glabbd had, dodefier isch en Haufe Ärwed nodwendig g´wäse. Bombig hen´ders g´machd!!!

Mid´em Goddesdienschd mit denne zwai Subba-Pfarrer, die dann a noch die neie Blätz eigweid hen, hemma a gezaigd, dass mer wisse, dass ohne den Beischdand von owwe nix, awwa gar nix, gehd.

Näwwa de viele Fußballschbiel war em Mondag Morje ä richdigs Gewusel uff de Blätz mid de Kinna vom Kinnergarde und de Grundschuul. Middaags hemma dann alde Lieder g´sunge - so wie frieja.

D´Kich isch bei Allene a sauguud okomme, weil des Tiem um de Herbert profihafd g´schaffd had.

Zum Abschluss hemma dann a noch die sieddeitsch Moischderschafd fir die Eldere durchg´fiehrd. Alda Freind, hen die nach de Schbiel saufe kenne, die Hesse hen jo gar nemmeh hoim g´welld.

So, un weil alles so subba g´gloffe isch un weil des ohne Eich ned gange wär, hemma Eich eiglade un welle mid dem Obend oifach - Dank-Schee sage.

Awwa Ihr wissed: "Lebbe gehd weida" un des haißd, dass mer Eich a noch in de Zukunfd brauche. Lassed Eich also ned henge un mache´d weida so mid!!!

Eier Alderle